Erin Serracino Inglott

Erin Serracino Inglott (twieled l-Isla fis-16 ta' Ottubru 1904 – miet fit-22 ta' Awwissu 1983) kien drammaturgu, poeta, rumanzier, kittieb ta' novelli, lessikografu, filologu u traduttur Malti.

Erin Serracino Inglott
Ħajja
Twelid	16 Ottubru 1904
Nazzjonalità	Malta
Mewt	22 Awwissu 1983
Edukazzjoni
Alma mater	Università ta' Malta
Lingwi	Malti Ingliż Taljan
Okkupazzjoni
Okkupazzjoni	poeta kittieb traduttur

Bijografija

Erin kien bin Antonio Serracino u Pia Inglott. Studja fil-Liċeo (1915-1920) u fl-Università ta' Malta u ħa kors tal-Letteratura (1921-1924). Sa minn żgħożitu Erin kellu kilba għall-kotba. Daħal fis-Servizz Ċivili (1927-1963) u serva għal xi żmien bħala segretarju tal-Università ta' Malta.

Fl-1993 iżżewweġ lil Leonilda Gatt u ma baqax joqgħod l-Isla iżda mar joqgħod Bormla, fi Triq Santa Margerita u baqa' joqgħod hemm sakemm miet. Fi żmien il-gwerra iżda, kien mar joqgħod għal ftit żmien, Birkirkara. Kellhom ħamest itfal, tliet ibniet u żewġ subien. F'Bormla, Erin Serracino Inglott kien jattendi l-Literary and Debating Society, soċjetà maqtugħa għalkollox mill-attivitajiet politiċi li l-iskop ewlieni tagħha kien li jsiru laqgħat dwar il-kitba, il-movimenti letterarji u suġġetti oħra varji. B'hekk tħajjar biex isir membru tal-Akkademja tal-Malti. Kien jaf l-Ingliż, it-Taljan, il-Latin, il-Franċiż, l-Ispanjol, il-Ġermaniż u r-Russu.

Erin Serracino Inglott kellu tliet delizzji prinċipali: il-lingwa, l-iskakki u l-mużika. Dawn it-tliet delizzji kibru miegħu fl-interess u fl-importanza għax ma kienx jaf b'medjokrità u jieqaf hemm, imma kellu fih sens profond li kien iġiegħlu jħoss li kull xogħol li jidħol għalih għandu jkollu fuqu t-timbru tal-kompetenza u tal-kreatività.

Fl-iskakki Erin rebaħ il-kampjonat diversi drabi u fis-sena 1938 mar jikkompeti maċ-ċampjin dinji fejn ġab dro f'logħba li ħajritu jkompli miexi fit-triq tas-suċċess.

Għalkemm kien iqatta' ħafna sigħat jikteb, xorta kien isib il-ħin għall-familja. Kienu jgħidu r-rużarju flimkien, joħroġ mal-familja u wkoll jeħodhom jgħumu, basta x'ħin irid hu. Kien iħobb ħafna l-annimali u skont ibnu, Erin Serracino Inglott kellu ammorin li kien jgħid ir-rużarju magħhom. Kien wasal lejn l-aħħar tal-kitba tad-dizzjunarju, Il-Miklem Malti, meta miet fl-età ta' 78 sena.

Xogħlijiet

• Il-miklem Malti – ġabra ta' kliem li jinsab fl-ilsien Malti mill-eqdem magħruf u miktub, ukoll dak li m'għadux jingħad, sal-iġded magħżul u milqugħ, li beda jingħad, miktub kif jixraq bit-tiswijiet meħtieġa, u mogħni bit-tifsir tan-nisel Semitiku jew Rumanz skont is-sengħa/ix-xogħol ta' Erin Serracino Inglott, Klabb Kotba Maltin, Malta, 1975-1989.

Drammi

• Razju Vidal, G. Muscat, Malta, 1941
• Ir-raġel li ħadha mal-mewt, Malta, 1945
• Il-barrani, A.C. Aquilina, Malta, 1956
• Ir-raħeb, Klabb Kotba Maltin, Malta, 1971
• Ir-raġel li twieled mill-gdid (dramm fi tliet atti), Malta, 1971
• Il-wiċċ u l-qalb (buzzett f'att wieħed), Malta, 1971
• Il-bażużlu, Klabb Kotba Maltin, Malta, 1978
• Il-Kerjoti (u żewg drammi oħra), Pubblikazzjonijiet Indipendenza, Malta, 1993

Traduzzjonijiet

• It-taħbila tal-kamra s-safra, rumanz ta' (Mystere de la chambre jaune). Giov. Muscat, Malta, 1947
• Dante Alighieri: Id-divina commedia bil-Malti. L-infern. xxxix Stamperija tal-Gvern, Malta, 1964
• Il-qarnita: ġrajja oħra ta' Routetabille miktuba minn Gaston Leroux, Stamperija Nazzjonali, Malta, 1972

Poeżija

• Is-sabiħ u l-ikrah (1939)
• Ix-xita (1945)
• Nemel (1946)
• Xi ħaġa baqa' (1947)
• Lil G. B. S (1947)
• Ġesù u l-Madliena (1948)
• Sunetti tal-gwerra (1948)
• Talba lil ommi mejta (1950)
• Xejn... (1950)
• Jahweh (1967)
• Lill-mewt (1967)

Ix-xita

L-iżjed poeżija popolari ta' Erin Serracino Inglott hi bla dubju Ix-xita (1945):

Dix-xita li tinżel kull mita jiftlilha, u traxxax u tbexxex u xxarrab u tħarrab lin-nies bla qies, jagħtini ngħidilha: Ja xita ħallini, mur saqqi u baqqi l-għelieqi, il-ġwiebi u l-bwieqi fawwarhom l-imxarab imliehom isqihom kemm tiflaħ u lili ħallili l-mistrieħ, f'ġieħ l-erwieħ!

Kif jasal is-Sibt u nkun ħsibt għal ħarġa, kif ninżel it-tarġa tal-bieb, u bla ħsieb nitgħaxxaq bis-sema sabiħ u narah li ma fih ebda sħaba; u noħroġ mid-dar bla għata għax tisreġ ix-xemx u ħlief sħana ma hemmx; u moħħi mistrieħ jien immur fuq is-sur jew indur fuq xi bur, mingħajr ħsieb ma' xi ħbieb, dix-xita li tinżel kull mita jiftlilha, taraha tibdielek tqattarlek tiżdiedlek toktorlok traxxaxlek tbexxixlek tlanġaslek u lili taħsilni xxarrabni tgħawwimni tkarkarni, bla basra, jaħasra, nsir għasra… U mxarrab imħarrab, imċaflas, imċarċar, imċallas, imċallam, imċappas, ikolli bħal ħmar ninġabar bis-sabar id-dar fejn in-nar!

Jagħtini ngħidilha: Ja xita ħallini, mur saqqi u baqqi l-għelieqi, il-ġwiebi u l-bwieqi fawwarhom l-imxarab imliehom isqihom kemm tiflaħ u lili ħallili l-mistrieħ, f'ġieħ l-erwieħ!

Jekk jiena nkun ħsibt u barra nkun ġibt biex nitgħatta u nitgeżwer, għax nilmaħ minn kmieni lis-sema sewdieni u l-ilma tax-xita ġejjieni, u noħroġ bil-"ħassa" taħt idi imrassa, mixdud b'żarbun taċ-ċfales u t-tjun, titħajjar dix-xita li tinżel kull mita jiftlilha, jibdielha li tinżel, u, flokha, fis-sema taraha toħroġlok tisriġlek taħraqlek ix-xemx! U lili taqlini tikwini taħmini tixwini; bla basra jaħasra nsir għasra bil-għaraq, u mleffef imkebbeb imfesdaq imlenbeb imqartas imfisqi imdagħdagħ għarqan u għatxan lehġien u għajjien ikolli bħal ħmar ninġabar bis-sabar id-dar!

Jagħtini ngħidilha: Ja xita li tinżel kull mita jiftillek, int issa ridt tibqa' maħġuba mgħottija maħruba moħbija? Ħallihom l-għelieqi u l-bwieqi u l-ġwiebi u qattar u raxxax u bexxex u lanġas u xarrab lix-xemx, u lili ħallili l-mistrieħ f'ġieħ l-erwieħ!

Novelli

• Dwiem, Il-Malti, Settembru 1944

Artikli oħra

• Ħsibijiet imxerrda, Il-Malti, Mejju, 1940
• Nisel, Il-Malti, Mejju, 1947
• Il-palk ta' żgħużiti, 1966
• Fehmti Dwar Xi Problemi fl-Ortografija tal-Malti, Il-Malti, 1977

Referenzi

1. ^ "Erin Serracino Inglott (minn intervista li saret lil ibnu Mario), L-Akkademja tal-Malti". Arkivjat minn l-oriġinal fl-2014-08-20. Miġbur 2013-03-06.
2. ^ Alexander Alekhine vs Erin Serracino-Inglott Għawdex, Malta 1935
3. ^ "Past Malta Champions - Malta Chess Federation" (bl-Ingliż). 2021-01-08. Miġbur 2022-12-30.
4. ^ "Il-palk ta' żgħużiti". Arkivjat minn l-oriġinal fl-2013-04-24. Miġbur 2013-03-06.